SA MALAPAD NA BINTANA NG SILID-ARALAN

SA MALAPAD NA BINTANA NG SILID-ARALAN
Rufino Tan Garcia Jr.

Hindi ko alam kung anong mayroon sa labas ng silid-aralan at kung bakit ko ito pinagmamasdan. Ito ba ay dahil sa asul na kalangitan na nalalatagan ng mga puting ulap o sa nakakairitang ingay na hatid ng mga estudyanteng naghaharutan sa daan? Ngunit bakit sadyang kay payapa ng aking pakiramdam sa mga oras na nasa harapan ako ng malapad na bintana ng silid-aralan. Alikabok na nakapupuwing at ilang saglit na pagkangalangay ng leeg lang ang mapapala ko pero maano ba? Eh dito ako nag-eenjoy! Parang batang nanonood ng palabas sa teatro - ang kaibahan nga lang ay natural ang drama at walang rehearsal.

Isa ako sa mga taong mainipin. Hindi ako sanay na maghintay at pinaghihintay. Kinaiinisan ko ang mga taong mabagal, makupad at kalahi ng pagong. Ayoko sa mga nagpapa-VIP na akala mo ay importante. Galit ako sa mga taong nagsasayang ng oras na parang jeep lang at umaasang marami pang dadaan. Isinusumpa ko ang lahat ng nagsasalita ng “mamaya”, “saglit”, “teka”, at “matagal pa”. Doon sa airport, noon lang ako nakapagintay ng pagkatagal-tagal. Salamat dahil sakay ng eroplano ang mahal kong tita dahil kung hindi ay itutulak ko na ito para bumilis. Bukod pa nung graduation ko nung highschool, na talaga namang nainip, natuyo, napanis at nilangaw na sa puwesto ko. Wala rin namang nagawa ang lahat ng santo na kilala ko at nabanggit at dinasalan ko para lamang makuha ko ang diploma ko. Pati si Satanas ay hiningan ko na rin na tulong ngunit wala pa rin at kung kasalanan man yun, pasensya na. Wala talaga… Matagal parin. Sa ilalim ng asul na langit, ng konkreto gusali, ng malawak na silid na may berdeng pintura, sa tapat ng maluwang na bintana at sa tapat ng makapigil hiningang tanawin, ibang tao ang nkatayo.
Ito na nga talaga. Pagbabago na kay bilis. Ngunit mabilis nga ba o matagal na talaga at ngayon ko lang napagtanto.Yun na nga siguro. Haaay…pagbabago nga naman. Sa tulong ng malapad na bintana, nagising ako. . Mayroong pumasok na bagong hangin at kay sarap sa pakiramdaman.Mayroong salamin na kumikislap pag tinatamaan ng sinag. Buhay na palaging bukas sa pagbabago at hindi kailanman magsasara.